Maharashtra Assembly Election 2024 : राज्यात विधानसभा निवडणूक जाहीर झाली आहे. त्यासाठी केंद्रीय निवडणूक आयोगानंदेखील कंबर कसली आहे. नागरिकांनी जास्तीत जास्त संख्येनं मतदान करावं आणि लोकशाहीच्या पर्वात सहभागी व्हावं, यासाठी निवडणूक आयोगाद्वारे विविध उपाययोजना केल्या जात आहेत. याच पार्श्वभूमीवर निवडणूक आयोगानं आता मोबाईलवर मतदार यादीतील नाव आणि मतदान केंद्र शोधण्याची सुविधा उपलब्ध करून दिली आहे. मतदान केंद्र शोधताना ऐन वेळी गोंधळ होऊ नये म्हणून आयोगानं हे पाऊल उचललं आहे. निवडणूक आयोगाच्या ‘वोटर हेल्पलाइन’ या अॅपवर तुम्हाला मतदार यादीतील नाव आणि मतदान केंद्र लगेच शोधता येणार आहे.
सर्वांत आधी प्ले स्टोअरमधून ‘वोटर हेल्पलाईन’ हे अॅप डाऊनलोड करा. त्यानंतर तुम्ही नवीन युजर असाल, तर सर्वांत आधी न्यू युजरवर क्लिक करून रजिस्ट्रेशन करा. किंवा तुम्ही गेस्ट युजर म्हणूनही लॉगिन करू शकता. लॉगिन केल्यानंतर वरच्या बाजूला तुम्हाला ‘search your name in electoral roll’ असा एक सर्च बॉक्स दिसेल. त्यावर क्लिक करा.
सर्च बॉक्सवर क्लिक केल्यानंतर तुम्हाला मतदान यादीतील नाव आणि मतदान केंद्र शोधण्यासाठी चार पर्याय मिळतील. पहिला पर्याय म्हणजे तुम्ही मोबाईल क्रमांक टाकून तुम्ही तुमची माहिती मिळवू शकता. त्याशिवाय तुम्ही मतदान कार्डावरील क्यूआर कोड स्कॅन करू शकता. तसेच तुमची वैयक्तिक माहिती भरून किंवा मतदान कार्डावरील EPIC क्रमांक भरून, तुम्हाला मतदान यादीतील नाव आणि मतदान केंद्र शोधता येईल.
पहिला पर्याय (मोबाईल क्रमांक) : पहिल्या पर्यायावर क्लिक केल्यानंतर तुम्हाला तुमचे राज्य आणि मोबाईल क्रमांक भरावा लागेल. मोबाईल क्रमांक भरताच तुम्हाला एक ओटीपी प्राप्त होईल. तो ओटीपी टाकल्यानंतर तुम्हाला तुमचे नाव, वय, पत्ता, मतदान यादीतील क्रमांक व मतदान केंद्र, अशी संपूर्ण माहिती मिळेल.
दुसरा पर्याय (मतदान कार्डावरील क्यूआर कोड) : मतदान कार्डवरील क्यूआर कोड स्कॅन करून, तुम्हाला थेट मतदान यादीतील क्रमांक आणि मतदान केंद्राबाबतची माहिती मिळेल.
तिसरा पर्याय (वैयक्तिक माहितीद्वारे) : जर तुम्हाला पहिले दोन पर्याय वापरताना अडचण येत असेल, तर तुम्ही तिसऱ्या पर्यायाचा वापर करू शकता. त्यासाठी ‘search by details’ यावर क्लिक करा. त्यानंतर तुम्हाला तुमचे नाव आणि आडनाव, तुमच्या वडील किंवा आईचे नाव, वय, लिंग, राज्य, जिल्हा व मतदारसंघ, अशी संपूर्ण माहिती भरावी लागेल. ही माहिती भरताच तुम्हाला तुमचे मतदान केंद्र आणि मतदार यादीतील क्रमांक मिळेल.
चौथा पर्याय (EPIC क्रमांक) : तुम्ही EPIC क्रमांक भरूनही मतदान केंद्र आणि मतदार यादीतील क्रमांकाविषयी माहिती मिळवू शकता.
मतदार यादी डाऊनलोड येथे डाऊनलोड करा
आपल्याला अधिक माहिती जाणून घेण्यासाठी खालील दिलेल्या व्हिडिओ देखील पहा
